Conventiculum septimum: invitationis epistolium

Beatus Salodurensis Latinitatis cultoribus cultricibusque salutem plurimam dicit!

Vos invitare velim ad circuli Latini Salodurensis conventiculum septimum.

Quando?

• Kal. Dec. a. 2016°; inde ab hora quinta usque ad horam sextam postmeridianam

Ubi?

• in conclavi K07 Gymnasii Cantonalis Salodurensis

Quis? Quid?

• Salutatio
• De responsorio graduali Monasterii Vallis Sanctae Catharinae deque litteris initialibus picturatis (Alfonsus Turicensis)
• De noctibus Vindonissensibus sive de pernoctando in contuberniis Romanis ab archaeologis restitutis (Beatus Salodurensis)
• De quibusdam aenigmatibus, quae Dantes ille Aligherius nobis proponit (Daniele Salodurensis)
• Varia

Quomodo conventiculo interesse possum?

• Si conventiculo interesse vis, scribe quaeso ad b.j@bluewin.ch (nam illa prima mihi cura est, ut satis vini nobis suppetat, ne quis siti laboret.)

Bene valete!

Obiter: Ne quis sollicitetur, addendum est hoc: Nemo sessionibus nostris ad Latine loquendum compellitur. Namque pergratus nobis est, quisquis conventiculis nostris ut auditor interest.

Conventiculum sextum: invitationis epistolium

Beatus Salodurensis Latinitatis cultoribus cultricibusque salutem plurimam dicit!

Vos invitare velim ad circuli Latini Salodurensis conventiculum sextum.

Quando?

• 20° die mens. Sept. a. 2016°; inde ab hora quinta usque ad horam sextam postmeridianam

Ubi?

• in conclavi K07 Gymnasii Cantonalis Salodurensis

Quis? Quid?

• Salutatio sive quaedam de Salodurensium superbia: Proponet Beatus Salodurensis quasdam notulas de illo Glareani humanistae disticho, quod est: «In Celtis nihil est Saloduro antiquius unis / exceptis Treveris, quarum ego dicta soror.» 
• Carmina Mani Matteri pertinent ad patrimonium musicum Helveticum. Hoc anno poeta ille Bernensis et idem iure consultissimus factus esset octogenarius. Quam ob rem peropportune Martinus Vilicus Palaeopolitanus de Matteri poematibus disseret. Oratione Martini habita carmina Matterina una Latine canendi nobis erit occasio.
• Varia

Quomodo conventiculo interesse possum?

• Si conventiculo interesse vis, scribe quaeso ad b.j@bluewin.ch (nam illa prima mihi cura est, ut satis vini nobis suppetat, ne quis siti laboret.)

Bene valete!

Ne quis sollicitetur, addendum est hoc: Nemo sessionibus nostris ad Latine loquendum compellitur. Namque pergratus nobis est, quisquis conventiculis nostris ut auditor interest.

Scribebam Saloduri, quod oppidulum sub Iura Monte situm est, anno 2016°, mense Augusto

Conventiculum quintum: invitationis epistolium

Beatus Salodurensis Latinitatis cultoribus cultricibusque salutem plurimam dicit!

Vos invitare velim ad circuli Latini Salodurensis conventiculum quintum.

Quando?

• 4° die mens. Iul. a. 2016°; inde ab hora quinta usque ad horam sextam postmeridianam.

Ubi?

• in conclavi K07 Gymnasii Cantonalis Salodurensis

Quis? Quid?

• Alfonsus Künzle, sodalis noster Turicensis, habebit orationem cum titulo «De epigraphia imperii Romani». Primum de aliquibus quaestionibus generalibus disseret, deinde de tribus generibus titulorum loquetur, nempe: de titulis sacralibus, de titulis in operibus publicis et privatis inscriptis, de titulis sepulcralibus.

• Mense Martio huius anni Conradus Gesnerus Turicensis quingentesimum diem explevit natalem. Qua de causa Beatus Salodurensis de illo polyhistore ingenioso praecipueque de eius libro «Bibliotheca universalis» inscripto quaedam proponet.

• Daniele Salodurensis de quadam expositione Erasmo Roterodamo dedicata verbis referet brevibus. Nam abhinc quingentos annos Erasmi novi testamenti editio praeclara in lucem edita est – scilicet Basileae in urbe. De his rebus docet expositio, quae his diebus in Museo Historico Basiliensi editur.

Quomodo conventiculo interesse possum?

• Si conventiculo interesse vis, scribe quaeso ad b.j@bluewin.ch (nam illa prima mihi cura est, ut satis vini nobis suppetat, ne quis siti laboret.)

Bene valete!

Scribebam Saloduri in oppidulo d. 14° mens. Mai. a. 2016°

Conventiculum quartum: invitationis epistolium

Beatus Salodurensis Latinitatis cultoribus cultricibusque salutem plurimam dicit!

Vos invitare velim ad circuli Latini Salodurensis conventiculum quartum.

Quando?

• 2° die mens. Mai. a. 2016°; inde ab hora quinta usque ad horam sextam postmeridiana.

Ubi?

• in conclavi K07 Gymnasii Cantonalis Salodurensis

Quis? Quid?

• Habet Daniele Salodurensis oratiunculam de Harrio Pottero, quam oratiunculam conventiculo mense Febr. exeunte celebrato ob soceri obitum habere non potuit.

• Profert Beatus Salodurensis nonnullas animadversiones de libro intitulato «Οὐρεσιφοίτηϛ Helveticus sive itinera per Helvetiae Alpinas regiones facta a Johanne Jacobo Scheuchzero». Sermo ergo est de opusculo viri doctissimi Turico ab urbe oriundi, qui artem et medicam et mathematicam praeter ceteros calluit et idem fuit hydrologus, botanicus chorographusque.

•  Varia

Quomodo conventiculo interesse possum?

• Si conventiculo tertio interesse vis, scribe quaeso ad b.j@bluewin.ch (nam illa prima mihi cura est, ut satis vini nobis suppetat, ne quis siti laboret.)

Bene valete!

Scribebam Saloduri mense Martio ineunte a. 2016°

Conventiculum tertium: invitationis epistolium

Beatus Helvetius Salodurensis Latinitatis cultoribus cultricibusque salutem plurimam dicit!

Vos, collegae spectati, invitare velim ad circuli Latini Salodurensis conventiculum tertium.

Quando?

• 22° die mens. Febr. a. 2016°; inde ab hora quinta usque ad horam sextam postmeridianam.

Ubi?

• in conclavi K07 Gymnasii Cantonalis Salodurensis.

Quis? Quid?

• Oratiunculam habebit Daniele Italus Salodurensis de quodam puero apud Scholam Hogvartensem artibus magicis studente – videlicet de Harrio illo Pottero. Tractabit Daniele cum seriem librorum phantasticorum totam tum maxime incantamenta magica vocibus Latinis exarata. Ergo incantamenta adhibentes una cum Harrio contra magum pessimum Ducem Voldemortem pugnabimus.

• Oratiunculam quoque habebit Beatus Helveticus Salodurensis de libello quodam amatorio, immo vero erotico, qui saeculo XV gentibus Europaeis erat gratissimus. Confabulatur enim Beatus de narratiuncula illa c.t. «De duobus amantibus historia», quae fabula scripta est ab Aenea Silvio Piccolomini, poeta laureato, humanista ac filiarum duarum patre, qui per sex annos ecclesiae catholicae praefuit nomine Pii Secundi.

• Varia

Quomodo conventiculo interesse possum?

• Si conventiculo tertio interesse vis, scribe quaeso ad b.j@bluewin.ch (nam illa prima mihi cura est, ut satis vini nobis suppetat, ne quis siti laboret.)

Vobis omnibus optima quaeque in annum novum exopto. Sit vobis annus MMXVI felix, faustus fortunatusque!

Bene valete!

Conventiculum secundum: invitationis epistolium

Beatus collegis humanissimis salutem plurimam dicit!

Te, spectate collega, invitare velim ad circuli Latini Salodurensis conventiculum secundum.

Quando?

• pridie Kal. Dec. a. 2015°;  inde ab hora quinta usque ad horam sextam postmeridianam
• vulgo: Montag, 30. Nov. 2015, 17.00 bis 18.00 Uhr

Ubi?

• in conclavi K07 Gymnasii Cantonalis Salodurensis

Quid?

• De linteo sepulcrali Taurinensi
• Miscellaneae considerationes de itinere Florentiam in urbem nuper factum sive de David illo Michelangeliano
• De quadam nave apud insulam Anticytheram fracta sive de expositione Basiliensi

Quomodo conventiculo interesse possum?

• Si conventiculo secundo interesse vis, scribe quaeso ad b.j@bluewin.ch (nam satis vini ad pocula Bacchi libanda nobis suppetat!)

Valete!

Summarium primi conventiculi

Conventiculum primum habitum est in conclavi K07 Gymnasii Cantonalis Salodurensis die 16° mens. Sept. a. 2015°, inde ab hora quinta usque ad horam sextam postmeridianam.

Adsunt Ursula Mathez, Bernhardus Tranquillus (Ruh), Andreas Colonus (Colón), Daniele Italus Salodurensis (Supino), Beatus Helvetius Salodurensis (Jung).

Disseruit Beatus de Latinitate in interrete vigente: scilicet de hominibus pipiantibus, de actis diurnis, de emissionibus radiophonicis, de diariis, de grege Latine loquentium, de viris Ciceronis sermonem optime callentibus, videlicet de Valahfrido Stroh Aloisioque Miraglia.

Omnes sessionis participes se iterum ad Latinitatem fovendam conventuros esse unanimiter constituerunt. Aliis verbis: Circulus Latinus Salodurensis constitutus est. Vivat, floreat, crescat! Bonis avibus coepta res est, melioribus procedat!

Memoratu quoque dignum est vinum, cervisiam, crustula omnibus bene sapivisse. 

Proximum conventiculum mense novembri habebitur.